Nga Ndokë Kola
Thethi, një prej perlash të Alpeve Shqiptare, është kthyer këto ditë në arenë dhune dhe përplasje të ashpra mes banorëve dhe forcave të rendit.
Aksioni i Inspektoratit Kombëtar të Mbrojtjes së Territorit (IKMT) për shembjen e ndërtimeve pa leje ka degjeneruar në përplasje fizike, ku policia është akuzuar për dhunë të pastër ndaj qytetarëve të pambrojtur.
Pamjet që kanë qarkulluar masivisht në rrjetet sociale tregojnë policë të armatosur që rrahin banorët, mes tyre edhe gra e të moshuar, duke i tërhequr zvarrë, ndërsa këta të fundit përpiqeshin të mbronin shtëpitë dhe bizneset e tyre.
“Na rrahin në derën tonë”
“Na rrahin në prag të derës sonë. Ku të shkojmë? Këtu kemi lindur, këtu kemi jetuar gjithmonë”, shprehet një banore e zonës, që kishte dalë për të mbrojtur shtëpinë e saj.
Sipas dëshmitarëve, policia ka ndërhyrë me dhunë të papërmbajtur, duke mos kursyer as fëmijët dhe të moshuarit, ndërsa zona sot është e rrethuar nga forcat e rendit dhe mjetet e IKMT-së që vazhdojnë prishjet.
Policia: Rezistencë e dhunshme, vepruam në mbrojtje të ligjit
Policia e Shtetit, në një deklaratë zyrtare, ka justifikuar dhunën duke thënë se është përballur me rezistencë aktive dhe se aksioni është bazuar në ligj.
“Ndërhyrja ishte e domosdoshme për të garantuar zbatimin e vendimeve ligjore për shembjen e ndërtimeve të paligjshme,” thuhet në deklaratën e Policisë.
Por pamjet flasin ndryshe. Banorët ishin të armatosur vetëm me trupat e tyre, ndërsa kërkonin ndaljen e prishjeve dhe hapjen e një dialogu.
Turizmi, viktimë e dhunës
Në kulmin e sezonit turistik, Thethi sot i ngjan një fshati të rrethuar, ku turistët e huaj po largohen në panik.
“Kemi vite që mundohemi ta mbajmë gjallë këtë fshat me turizëm, tani po na rrahin e po na prishin gjithçka”, thotë një operator turistik lokal.
Guidat turistike paralajmërojnë pasoja të rënda për imazhin e Shqipërisë, pasi Thethi, nga simbol i turizmit natyror, po shndërrohet në simbol të dhunës shtetërore dhe represionit.
Shteti, i padukshëm për vite, i dhunshëm sot
Banorët e Thethit nuk e kanë parë shtetin për vite me radhë: pa ndihmë për legalizime, pa rrugë funksionale, pa investime në infrastrukturë. Sot, shteti është shfaqur me shkopinj gome dhe buldozerë.
“Këta që nuk kanë bërë asgjë për ne, sot kanë ardhur të na prishin e të na rrahin”, thotë një tjetër banor i fshatit.
Nga peizazh turistik, në skenë përplasjeje
Kjo situatë e rëndë ka rihapur debatin për mënyrën si shteti shqiptar ndërhyn në zonat e mbrojtura.
Në vend që të krijohet një plan legalizimi e rregullimi për ndërtimet tradicionale, qeveria ka zgjedhur rrugën më të ashpër: prishje masive, shoqëruar me dhunë ndaj banorëve.
Ekspertët paralajmërojnë se kjo qasje e gabuar mund të ketë pasoja afatgjata jo vetëm për imazhin e Thethit, por edhe për të gjithë sektorin e turizmit malor.
Thethi sot, nesër kush?
Nëse situata nuk zgjidhet me dialog dhe paqësisht, Thethi rrezikon të shndërrohet në shembullin më të keq të shtypjes së komuniteteve lokale në Shqipëri.
Ky nuk është vetëm një aksion prishjesh. Është një plagë e thellë sociale, që po shfaqet me fytyrën më brutale të dhunës shtetërore.
Nga Nokë Kola
Për EuroAlbania
