Marco Rubio ka deklaruar se një marrëveshje për t’i dhënë fund luftës në Ukrainë është “afër, por jo mjaftueshëm afër”, duke theksuar se SHBA-të mund të tërhiqen nga bisedimet e paqes nëse nuk ka përparim brenda ditëve të ardhshme.
Trump pati një takim të jashtëzakonshëm me Presidentin Zelensky, ku u shpreh optimist për një marrëveshje paqeje. Megjithatë, ai gjithashtu kritikoi Putinin për sulmet ndaj qyteteve ukrainase dhe Zelenskyn për kërkesat e tij lidhur me Krimenë. Takimi ndodhi në prag të funeralit të Papës dhe, sipas Zelenskyt, pati “potencial historik”, duke theksuar se do të jetë një hap i rëndësishëm në kërkimin për paqe
Sekretari i shtetit i SHBA-së tha se përpjekjet e Presidentit Trump për të ndërmjetësuar mes Ukrainës dhe Rusisë po hynin në një “javë kritike” dhe shprehu shqetësimin për përparimin e ngadaltë. ‘Tani është koha për të vendosur”-tha ai. SHBA-të kanë ushtruar presion mbi Ukrainën që të pranojë një marrëveshje paqeje që kërkon pranimin e kontrollit rus mbi territore të pushtuara. Zelensky ka refuzuar të njohë sovranitetin rus mbi Krimenë dhe ka kërkuar një fund të menjëhershëm të luftimeve.
