Me të marrë miratimin në parlament, Instituti i Sigurimeve Shoqërore është gati këtë pranverë të hapë aplikimet për njohjen automatike të viteve të punës.
Mjafton një deklaratë nga personi që kërkon të dalë në pension, që ka punuar për disa vite në një ish-kooperativë, ish-ndërmarrje bujqësore a shtetërore që t’i bashkëngjitet dosjes së dokumenteve të tjera që vitet e kërkuara të konsiderohen si vite pune. Vendimi është marrë tashmë dhe ka hyrë në fuqi, por aplikimi do të kërkojë kohë, pasi pritet një vendim i dytë që detajon llojet e aktivitetit dhe ndërmarrjeve ku njihen këto vite pune.
Në përgjithësi, bëhet fjalë për ndërmarrje, dosjet e të cilëve figurojnë të mangëta në regjistra, janë djegur fare regjistrat apo kanë humbur me kalimin e viteve. Duhet nënvizuar se ligji nuk ka fuqi prapavepruese. Referuar deklaratave nga përfaqësuesit e Institutit të Sigurimeve Shoqërore, përfitues do të jenë vetëm ata që dalin rishtazi në pension dhe jo të tjerë, të cilët e kanë kërkuar të drejtën e tyre në rrugë administrative apo gjyqësore. Ndërkohë që edhe ata individë që janë në proces ankimimi administrativ apo gjyqësor kanë të drejtë të shmangin këto procedura pasi janë objekt përfitimi të ligjit.
