Shqiptarët kanë braktisur hotelet në gusht dhe tashmë kjo konfirmohet edhe nga shifrat zyrtare të strukturave akomoduese.
Sipas publikimit të Institutit të Statistikave (INSTAT) rezidentet u rritën me vetëm 0.2 për qind sa i takon netqëndrimeve në hotele. Një vit më parë pra në gusht 2023 kjo rritje e netqëndrimeve ishte 55.7 për qind. Ndërkohë duket se edhe netqëndrimet e të huajve janë ngadalësuar duke zbritur në 16.9 për qind teksa një vit më parë rritja ishte 64.5 për qind.
“Në muajin Gusht 2024, treguesit e shfrytëzimit të kapaciteteve të strukturave akomoduese, paraqiten si më poshtë: Numri i vizitorëve gjithsej është rritur me 32,0 %, në krahasim me Gusht 2023. Të njëjtën ecuri ndjekin edhe dy treguesit e mëposhtëm: numri i vizitorëve rezident është rritur me 1,2 %; numri i vizitorëve jo-rezident është rritur me 50,6 %. Numri i net qëndrimeve gjithsej është rritur me 11,3 %, në krahasim me Gusht 2023. Të njëjtën ecuri ndjekin edhe dy treguesit e mëposhtëm: numri i net qëndrimeve nga rezident është rritur me 0,2 %; numri i net qëndrimeve nga jo-rezident është rritur me 16,9 %” thuhet në publikim.
Shifrat konfirmojnë edhe një herë atë që turoperatorët thanë gjatë muajve të pikut të verës se shqiptarët preferuan që të rezervonin jashtë vendit.
Kjo erdhi për shkak të rritjes së pakontrolluar të çmimeve në disa rajone kryesisht në Jug të vendit gjatë qershorit dhe që më pas krijoi një efekt zinxhir perceptimi në gjithë bregdetin duke sjellë edhe anulime nga të huajt kryesisht italianët. Pavarësisht rritjes së përgjithshme të turizmit gjatë këtij viti që është më shumë meritë e rritjes së turistëve gjatë pranverës dhe vjeshtës, vetë sezoni veror cilësohet më dobët se sezoni veror 2023.
