Në një lëvizje diplomatike të rëndësishme, kryeministri Edi Rama duket se ka arritur të stabilizojë marrëdhëniet me Greqinë, duke shënuar një përparim të dukshëm pas një periudhe tensioni sa i takon çështjes “Beleri”. Nga roli i pazarit për të emëruar Vangjel Tavon si kryera të Bashkisë së Himarës zyrtare, deri te lirimi i Fredi Belerit dje nga burgu që ishte kthyer në një molë sherri mes Tiranës dhe Athinës, marrëveshjet e arritura ndërmjet Ramës dhe kryeministrit grek, Kyriakos Mitsotakis përbëjnë një kapitull të ri në marrëdhëniet ndërkombëtare të dy vendeve. Këto zhvillime të fundit zbulojnë kulisat e një diplomacie të ndërlikuar dhe ndihmojnë në përmirësimin e marrëdhënieve dypalëshe, duke hedhur dritë mbi ndikimet dhe negociatat që kanë ndodhur pas skenave. Ky është një moment kritik që e tregon ndikimin e lidershipit shqiptar në arritjen e një zgjidhjeje të pranueshme dhe stabilizuese për marrëdhëniet mes Shqipërisë dhe Greqisë, ndërkohë që vlen të theksohet fakti se si kryeministri Rama, ashtu edhe homologu i tij grek Mitsotakis e përdorën “kartën Beleri” dhe nacionalizmin për t’u fuqizuar politikisht në vend respektove.
Vendimi
Dje Gjykata e Fierit i fali javët e mbetura të izolimit, Apeli i GJKKO e kishte dënuar me 2 vite burg. Ish-kryebashkiaku flet para mediave, gazetarëve helene u përgjigjet greqisht. Akuzon Qeverinë dhe Presidentin, thekson se do vijojë betejën ligjore: Nëse shpallem i pafajshëm, do kandidoj përsëri. Pak pasi Gjykata e Fierit i fali javët e mbetura të izolimit për dënimin me 2 vite burgim të formës së prerë nga Apeli i GJKKO-së, ish-kryebashkiaku i Himarës, Fredi Beleri, foli në dalje të Burgut për mediat shqiptare dhe greke, teksa u zbatua vendimi i lirimit nga autoritetet. I dënuar për korrupsion zgjedhor, ai e quajti vendimin si politik dhe të padrejtë, duke akuzuar kryeministrin Edi rama dhe qeverinë si ideatorë dhe autorë, teksa theksoi se çështjen do e dërgonte në Strasburg. Zgjedhjet e parakohshme të 4 Gushtit i quajti të paligjshme, teksa shtoi se komunikim me Vangjel Tavon do të ketë, por për të ai mund të jetë “kryebashkiak i Tërbaçit dhe jo qytetarëve himarjotë”. “Siç e dini, në Himarë, në Shqipëri, nuk ka zgjedhje. Pra nuk dihet se kur mbarojnë një palë zgjedhje, sepse pushteti ka vendosur që në këtë shtet të mos bëhen zgjedhje. Zgjedhjet u bënë më 14 Maj, kam dal fitues. Këto zgjedhje që u bënë më 4 Gusht ishin të paligjshme. I paligjshëm ishte shkarkimi im, i paligjshëm ishte dekreti i Presidentit. I paligjshëm ishte dhe vendimi i kryeministrit, që implikoi gjithë qeverinë, gjithë shtetin dhe mafien, për të fituar një palë zgjedhje në një fshat”. Eurodeputeti shpjegoi se do vijojë detyrën e tij të re mes Greqisë dhe Brukselit, por pa e harruar betejën që ka nisur. I pyetur nëse do bashkëpunojë me kryebashkiakun e ri ai tha: “Sigurisht që do komunikoj me Vangjel Tavon dhe me këdo që punon dhe do të punojë për të mirën e Himarës.
Por sigurisht që nuk besoj se zoti Vangjel Tavo, nga mënyra se si u përzgjodh, nga mënyra se si u zhvilluan ato zgjedhje, ka legjimitetin e qytetarëve të Himarës. Vangjel Tavo mund të jetë kryetar i Bashkisë së Tërbaçit, por jo i himarjotëve!” Ai u pyet edhe për të ardhmen politike dhe nëse do kandidojë përsëri në Himarë, duke e pohuar. “Sigurisht që do kandidoj. Do e çoj çështjen në Strasburg dhe kur të mbarojë, nëse vendimi i tij më nxjerr të pafajshëm, do kandidoj”, u shpreh Beleri. Beleri shtoi se nuk ka bërë asnjë festë për lirimin dhe as e priste vendimin, pasi nuk e dinte se çfarë do të ndodhte në seancë. Ai këmbënguli se vendimet ndaj tij kanë qenë politike. “Në radhë të parë falënderon avokatët e mi që gjatë këtyre 16 muajve më mbrojtën në mënyrë profesionale. Dhe se gjithë puna e tyre bëri që kjo çështje të çmontohej dhe të dukej padrejtësia para të gjithëve”.
Çfarë ka ndodhur?
Kujtojmë se Fredi Beleri u arrestua më 12 Maj 2023, dy ditë para zgjedhjeve lokale të 14 Majit 2023 në Himarë, ku doli fitues nga qelia e paraburgimit me diferencë 19 vota ndaj Jorgo Goros. Në një proces gjyqësor në GJKKO u dënua me 2 vite burg për korrupsion zgjedhor, pasi u gjet fajtor në blerjen e 8 votave me 400 euro në total. Pas vendimit të formës së prerë ai humbi mandatin, teksa KQZ dhe Presidenti shpallën zgjedhjet e parakohshme të Himarës më 4 Gusht të këtij viti, ku doli fitues kandidati socialist, Vangjel Tavo, i cili mori dhe detyrën e re.
