Arrestimi i dy drejtuesve të kartelit Sinaloa në Shtetet e Bashkuara të enjten u organizua nga njëri prej dy personave të arrestuar, Joaquin Guzman Lopez, djali i bosit famëkeq të bandës, Joaquin “El Chapo” Guzman.
Guzman Lopez organizoi arrestimin e tij së bashku me atë të Ismael “El Mayo” Zambada, i cili bashkëthemeloi kartelin Sinaloa me El Chapo.
Djali i El Chapo raportohet se bindi Zambada që të bënin një udhëtim me avion për të parë një pjesë toke që supozohej të ishte brenda Meksikës. Por në vend të kësaj, avioni u ul në El Paso, Teksas, ku agjentët federalë arrestuan dy bosët e kartelit.
Zambada nuk e dinte se hetuesit amerikanë kishin shfrytëzuar një përçarje brenda kartelit dhe se Guzman Lopez po i ndihmonte agjentët që ta vendosnin në pranga, tha një zyrtar për CNN.
Agjentët e FBI-së arrestuan dy udhëheqësit e kartelit sapo avioni u ul në Teksas, në një nga fitoret më të mëdha për zbatimin e ligjit amerikan kundër karteleve.
Karteli, një nga organizatat më të fuqishme të trafikut të narkotikëve në botë, mendohet të jetë përgjegjës për trafikimin e sasive të mëdha të kokainës, heroinës, metamfetaminës dhe fentanilit në SHBA.
Ekspertët kanë thënë për CNN se një luftë për pushtet midis djemve të Zambada dhe El Chapo, të njohur gjithashtu si Chapitos, ka ekzistuar për disa kohë në kartel. Me arrestimin e Zambadës, dhuna brenda kartelit dhe organizatave të tjera kriminale në Meksikë do të rritet.
Agjentët, të cilët kanë punuar me çështjen që nga fillimi i këtij viti kur Prokurori i Përgjithshëm Merrick Garland njoftoi akuzat kundër tre djemve të El Chapo, ishin skeptikë kur Guzman Lopez u bëri ofertën për të futur në kurth “El Mayo”.
I gjithë operacioni, tha një burim për CNN, shkoi çuditërisht pa probleme duke pasur parasysh peshën e arrestimeve dhe ndërprerjen që mund të shkaktonte në trafikun meksikan të drogës.
Zambada u deklarua i pafajshëm për të gjitha akuzat në paraqitjen e tij të parë në gjykatën federale të premten në mëngjes në El Paso dhe po mbahet pa garanci për shtatë akuza penale.
Ai gjithashtu pranoi të heqë dorë nga e drejta e tij për t’u paraqitur personalisht dhe për të kërkuar garanci në një seancë të caktuar për 31 korrik.
38-vjeçari Guzman Lopez u largua nga El Paso me një avioni të FBI-së të përdorur për operacionet e ekstradimit dhe mbërriti afër Çikagos mëngjesin e së premtes. Ai aktualisht ndodhet në paraburgim në zonën e Çikagos.
Ndërsa babai i tij është duke vuajtur dënimin e përjetshëm në një burg amerikan, pasi ai u dënua pesë vjet më parë për disa akuza.
Si Zambada ashtu edhe Guzman Lopez përballen me disa akuza në SHBA për drejtimin e operacioneve kriminale të kartelit të drogës, duke përfshirë prodhimin dhe trafikimin e fentanilit.
Avokati i Zambada tha për Los Angeles Times se klienti i tij nuk u dorëzua vullnetarisht.
