80% e fëmijëve në moshë çerdheje dhe kopshti në Bashkinë e Tiranës nuk gjejnë dot një vend në strukturat publike. Prindërit rrëfejnë se pranimi i fëmijëve kryhet përmes procedurave diskriminuese. Në kushtet e mohimit të këtij shërbimi nga bashkia, INA Media dëshmon se një pjesë e madhe iu drejtohen kopshteve të palicencuara.
Elisabeta, një oficere policie në Tiranë, nuk shkoi në punë javën e parë të qershorit.
“Është java e regjistrimeve në çerdhe e në kopsht”, – shpjegon ajo, duke na rrëfyer se po lëviz të gjithë gurët, që të gjejë vend për dy fëmijët e saj në strukturat publike.
“Deri tani i kam mbajtur me dado, por kushton shumë dhe shoh që fëmijët e mi nuk kanë të njëjtin zhvillim si shokët e tyre, që shkojnë në kopsht apo çerdhe”, – rrëfehet policja, teksa mban një tufë me dokumente në dalje të çerdhes 42 në Kinostudio.
Ajo tregon se nuk i përballon dot kostot për të dy vogëlushët në sektorin privat dhe se e vetmja zgjidhje është që të pranohet në sistemin publik. Për këtë ka shumë pasiguri.
