Është firmosur përfundimisht marrëveshja mes qeverisë shqiptare dhe Christmas Theatre për dhënien me qera të sallës në cilën do të zhvillohet takimi i kryeministrit Edi Rama me diasporën. Top Channel mundi të sigurojë ekskluzivisht një kopje të kontratës, e cila u firmos mes palëve. Në kontratë parashikohet zhvillimi i eventit ndërsa organizatorët marrin përsipër gjithë procedurën, sigurinë, ndriçimin, foninë dhe pastrimin. Vlen të përmendet se pala greke ka shmangur deri në pengim dhënien e ambienteve dhe u desh insistimi i zotit Rama që ambienti të jepet për eventin në fjalë. Edhe pse takimi i zotit Rama është privat, qeveria greke ka thënë se nuk e ka ftuar zotin Rama, por as mund ta ndalojë atë të zhvillojë këtë takim në Athinë. Për sigurinë e zotit Rama, qeveria greke ka vënë në dispozicion një autoveturë tip “Bmw” të blinduar dhe forca të shtuara sigurie. Zoti Rama do të mbërrijë në Athinë mëngjesin e së dielës dhe do të shkojë direkt në vendin e eventit. Mbas mbarimit të takimit me diasporën, kryeministri shqiptar do të marrë pjesë në asamblenë e PS në Greqi dhe do të shpërndajë karta anëtarësimi për dhjetëra të rinj që zgjodhën e anëtarësohen në partinë socialiste. Më herët gjatë ditës së djeshme, kryeministri Rama konfirmoi vendin dhe datën e takimit në sallën “Christmas Theatre” të stadiumit Galatsi të Athinës.