Një zjarr i përmasave të konsiderueshme ka shpërthyer këtë të premte në zonën e Rana e Hedhur, duke përfshirë masivin me pisha dhe duke shkaktuar alarm për shkak të afërsisë së flakëve me bizneset dhe objektet turistike që operojnë në këtë zonë bregdetare.
Menjëherë pas marrjes së njoftimit, në terren kanë mbërritur forcat zjarrfikëse, shërbimet emergjente dhe strukturat vendore, të cilat po punojnë intensivisht për izolimin e vatrës së zjarrit dhe parandalimin e përhapjes së flakëve në sipërfaqe të tjera pyjore.
Prioriteti kryesor i ndërhyrjes mbetet mbrojtja e pyllit me pisha, një nga asetet natyrore më të rëndësishme të zonës, si dhe garantimi i sigurisë për bizneset dhe pushuesit që frekuentojnë këtë destinacion turistik pranë Shëngjin.
Sipas informacioneve paraprake, deri më tani nuk raportohen persona të lënduar, ndërsa autoritetet vijojnë monitorimin e situatës për të shmangur çdo rrezik të mëtejshëm.
Shkaqet e rënies së zjarrit mbeten ende të paqarta dhe pritet të përcaktohen pas përfundimit të hetimeve nga autoritetet përkatëse.
Ndërkohë, ekipet në terren vijojnë operacionin për shuarjen e plotë të flakëve dhe vënien e situatës nën kontroll.
