Pas tragjedisë së rëndë në Durrës, ku humbën jetën dy fëmijë dhe një tjetër mbeti i plagosur, ka reaguar për herë të parë djali i Nikollë Radaçit, autorit të aksidentit fatal.
Në një mesazh publik, ai i ka kërkuar falje familjarëve të viktimave, duke theksuar se dhimbja e tyre është e pamatshme dhe se familja e tij e ndjen këtë tragjedi.
“Mesazhi ynë është: Nga zemra kërkojmë falje. E dimë që asnjë fjalë nuk mund ta zbusë dhimbjen, por ne e ndajmë këtë dhimbje me ta,” shprehet ai.
Ai pranoi gjithashtu se i ati kishte pasur probleme me konsumimin e alkoolit dhe se familjarët kishin qenë në dijeni të sjelljes së tij, por shtoi se nuk kishin mundësi ta kontrollonin vazhdimisht.
“Ka pasur raste që konsumonte alkool. Ne i kemi thënë të ketë kujdes, por nuk mund të jemi gjithmonë pranë tij për ta ndaluar,” thuhet në mesazh.
Djali i autorit thekson se familja nuk duhet të fajësohet për veprimet e tij, duke argumentuar se secili individ mban përgjegjësi personale për sjelljen e vet.
Reagimi vjen në një moment kur ngjarja ka shkaktuar tronditje të madhe në opinionin publik dhe ka nxitur debat mbi përgjegjësinë individuale dhe institucionale në raste të tilla.
