Deputetja socialiste dhe ish-ministrja e Jashtme, Elisa Spiropali, ka reaguar pas debatit të krijuar në radhët e Partisë Socialiste lidhur me deklaratën e saj për nevojën e një procesi vetëpastrimi brenda partisë.
Pak ditë më parë, Spiropali kishte kërkuar që PS të ndërmarrë një proces reflektimi dhe pastrimi të brendshëm, duke përdorur shprehjen: “pa smërçe, pa ndryshqe, pa pehlivanllëqe”.
Deklarata e saj u pasua nga kritika publike të kryetares së PS-së në Shkodër, Mirela Dodaj, e cila deklaroi se nëse një proces i tillë duhet të nisë, atëherë sipas saj ai duhet të fillojë nga vetë Spiropali.
Përgjigjja me vargjet e Anna Ahmatovës
Pa iu përgjigjur drejtpërdrejt kritikave, Spiropali publikoi në rrjetet sociale një fragment nga poezia e poetes ruse Anna Akhmatova, e lindur më 23 qershor 1889.
Në hyrje të postimit të saj ajo shkroi:
“Kur t’ju merren mend’ e t’ju përzihet nga fletë-rrufetë, sulmet banale, monitorimi digjital e operacional, kontrolli algoritmik, konspiracionet halucinante, gjuha e shthurur, lexoni këtë kryevepër të Anna Ahmatovës.”
Poezia e zgjedhur përcjell idenë se kritikat dhe sulmet mund të shndërrohen në forcë dhe motivim për të ecur përpara.
Debat brenda socialistëve
Reagimi i Spiropalit vjen në një moment kur brenda Partisë Socialiste po diskutohen publikisht çështje që lidhen me reformimin e partisë, përgjegjësinë politike dhe raportin me qytetarët.
Deklarata e saj për “vetëpastrim” ka nxitur reagime të ndryshme në radhët e socialistëve, ndërsa deri tani nuk ka pasur një qëndrim zyrtar nga drejtuesit e lartë të partisë mbi debatin e hapur mes figurave të saj.
Postimi i Spiropalit është interpretuar nga komentuesit politikë si një përgjigje indirekte ndaj kritikëve të saj dhe një mesazh se ajo nuk ndjen presion nga sulmet politike apo personale që i janë adresuar ditët e fundit.
