Sipas raportimeve mediatike, Prokuroria e Posaçme Kundër Korrupsionit dhe Krimit të Organizuar (SPAK) i ka komunikuar ish-zëvendëskryeministres Belinda Balluku statusin e të pandehurës edhe në një procedim penal që lidhet me gjashtë lote të tjera të projektit të Unazës së Madhe të Tiranës.
Raportimet bëjnë me dije se Balluku është thirrur në ambientet e SPAK, së bashku me avokatin e saj mbrojtës, për t’u njohur me akuzat dhe me vendimin për zgjatjen me tre muaj të afatit të hetimeve.
Sipas të njëjtave burime, Balluku ishte marrë më herët e pandehur në procedime të tjera që lidhen me lotin 4 të Unazës së Madhe dhe projektin e Tunelit të Llogarasë.
Ndërkohë, SPAK vijon hetimet edhe në një procedim tjetër për dyshime për korrupsion dhe pastrim parash, që lidhen me tenderë të zhvilluar në periudhën kur Balluku drejtonte shoqërinë “Albcontrol”. Sipas Prokurorisë, në këtë procedim po hetohen pretendime se dy tenderë i janë dhënë në kundërshtim me ligjin një kompanie ndërtimi dhe se Balluku ka përfituar një vilë në Dhërmi si ryshfet. Sipas SPAK, pasuria është sekuestruar me vendim të Gjykatës së Posaçme Kundër Korrupsionit dhe Krimit të Organizuar (GJKKO).
Deri në publikimin e këtij materiali, Belinda Balluku ose përfaqësuesit e saj ligjorë nuk kanë bërë një reagim publik lidhur me zhvillimet e raportuara.
Sqarim: Procedurat hetimore janë në vijim. Akuzat e ngritura nga Prokuroria përfaqësojnë dyshimet e organit të akuzës dhe do t’i nënshtrohen shqyrtimit gjyqësor. Belinda Balluku prezumohet e pafajshme deri në një vendim gjyqësor të formës së prerë.
