Shtëpia e Bardhë ka dhënë një paralajmërim të fortë ndaj Iranit, duke theksuar se presidenti Donald Trump është i gatshëm të ndërmarrë veprime edhe më të ashpra nëse Teherani nuk pranon kushtet për përfundimin e konfliktit.
Zëdhënësja e Shtëpisë së Bardhë, Karoline Leavitt, deklaroi se Trump synon paqen, por paralajmëroi se në rast refuzimi nga ana e Iranit, reagimi do të jetë i fortë.
“Presidenti Trump nuk bën bllof dhe është i përgatitur të shkaktojë ferrin. Irani nuk duhet të bëjë përsëri llogaritjet e gabuara,” u shpreh ajo.
Leavitt shtoi se, sipas vlerësimit të SHBA-së, Irani tashmë ka pësuar humbje të mëdha, duke përfshirë goditje ndaj strukturave të tij ushtarake, si dhe ndaj kapaciteteve ajrore dhe detare.
Ajo paralajmëroi se çdo përshkallëzim i mëtejshëm do të jetë përgjegjësi e Teheranit, nëse ai nuk pranon realitetin e situatës.
Deklaratat vijnë në një moment kritik për negociatat për armëpushim, ndërsa tensionet në Lindjen e Mesme mbeten të larta dhe rreziku i përshkallëzimit të konfliktit vijon të shqetësojë komunitetin ndërkombëtar.
