Ish-drejtuesi i lartë i Policisë së Shtetit, Shemsi Prençi gjatë një interviste në ‘Kafe Shqeto’, ka folur për vetëdorëzimin e ish-drejtorit të Policisë së Lezhës, Henrigert Mitri.
Sipas Prençit edhe ky është pjesë e atyre drejtuesve të rinj të policisë pjesë e grupeve kriminale, të cilët ministri i ri i Brendshëm, Ervin Hoxha kërkon tu lejë policinë në dorë.
‘Kam deklaruar para disa kohësh se krerët e policive vendore në disa qarqe të Shqipërisë, emërohen nga burgu 313. Disa kolegë e miq gazetarë më pyetën nëse është e vërtetë kjo gjë apo jo. Kjo është një e vërtetë sepse ky burim është nga një institucion hetimi.
Nga vitit 2016 ku në Shqipëri u masivizua kultivimi i drogës, dhe ju e mbani mend se sa drejtorë policie ikën jashtë vendit dhe më pas, pasi negociuan me prokurorinë u rikthyen duke u vetëdorëzuar.
Të njëjtën gjë bëri edhe ish-drejtori i Policisë së Lezhës, Henrigert Mitri. Ky është i atij brezi që pretendon ministri Ervin Hoxha që xhaketat e vjetra duhet ta dorëzojnë detyrën dhe duhet rifreskuar organizata me drejtues të rinj.
Fakti ka treguar se ky brezi i drejtuesve të rinj janë të gjithë pjesë e grupeve kriminale. Janë mbi 10 drejtorë policie që janë deklaruar nga SPAK, por ka edhe shumë të tjerë të cilët ende nuk janë dekriptuar’, tha Shemsi Prençi
