Pedagogu dhe ish-zyrtari i Partisë Demokratike, Roland Bejko, ka komentuar zhvillimet e fundit brenda PD-së, duke vlerësuar se lëvizja e re e nisur nga Ervin Salianji dhe Ilir Alimehmeti përbën “shpresën e fundit” për reformimin e forcës më të madhe opozitare në vend. Në një intervistë për gazetën “Tema”, Bejko theksoi se kjo nismë po ngjall reagime të forta pikërisisht sepse synon të krijojë një frymë të re politike, të shkëputur nga konfliktet e vjetra dhe ndikimi i lidershipit historik.
Sipas tij, Sali Berisha – aktualisht në krye të PD-së – do përpiqet me çdo mënyrë të bllokojë këtë lëvizje të re, ashtu siç, sipas Bejkos, ka ndodhur me çdo tentativë të ngjashme brenda së djathtës gjatë viteve. “Berisha do të përdorë çdo mjet për ta shkatërruar lëvizjen brenda PD-së pa u konsoliduar ende,” u shpreh Bejko, duke e akuzuar ish-kryeministrin se ka vepruar historikisht si figurë përçarëse në kampin opozitar.
Ai nënvizoi se Berisha ka arritur deri në “fshirjen e studentëve të Dhjetorit nga historia”, duke e cilësuar këtë si devijim të rëndë politik dhe moral. “Foltoret e dështuara të Berishës dhe sheshi me 300 veta tregojnë jo forcë, por kapitullim politik,” shtoi Bejko, duke argumentuar se lidershipi aktual i PD-së ka humbur lidhjen me bazën e dikurshme.
Në vlerësimin e tij, panorama politike sot është e deformuar nga një bllok i përbashkët interesash midis qeverisë dhe opozitës së vjetër. “Rama, Berisha, bashkë me oligarkët dhe krimin e organizuar, kanë marrë peng Shqipërinë,” tha ai, duke vendosur dy figurat historikisht kundërshtare në të njëjtën anë të skemës së ndikimit.
Bejko shtoi se Berisha gjendet sot në pozita të ngjashme me ministrat e akuzuar për korrupsion në qeverinë Rama: “të lidhur nga dosje dhe mallkime politike që i pengojnë të kërkojnë transparencë.”
Në këtë realitet, Bejko sheh lëvizjen e re brenda PD-së si mundësinë e vetme për të ringritur opozitën. Ai vëren se në këtë proces ka edhe “tradhtarë” dhe “armiq të brendshëm”, individë që lëkunden nën presion apo ndikime politike, duke penguar reformimin e vërtetë të forcës politike.
Megjithatë, Bejko mbetet optimist se fryma e re që po përpiqet të ngrihet mund të sjellë një gjeneratë të re dhe të pastër politikanësh në PD, duke shkëputur partinë nga varësia e gjatë ndaj figurave të tranzicionit.
