Kryeministri Edi Rama do të marrë pjesë në Samitin e NATO-s që zhvillohet në Ankara, ku do të mblidhen krerët e shteteve dhe qeverive të vendeve anëtare të Aleancës.
Sipas njoftimit të Agjencisë për Media dhe Informim (AMI), kreu i qeverisë do të shoqërohet nga bashkëshortja e tij, Linda Rama, si dhe nga delegacioni zyrtar shqiptar.
Gjatë punimeve të samitit, Rama do të zhvillojë një takim me Sekretarin e Përgjithshëm të NATO-s, Mark Rutte, ndërsa do të marrë pjesë edhe në sesionet plenare të diskutimeve me liderët e vendeve aleate.
Në ditën pas përfundimit të samitit, është parashikuar edhe një takim dypalësh mes kryeministrit shqiptar dhe Presidentit të Turqisë, Recep Tayyip Erdoğan.
Pjesëmarrja e Shqipërisë në këtë samit vjen në kuadër të angazhimeve të saj si vend anëtar i NATO-s, me fokus forcimin e bashkëpunimit në fushën e sigurisë dhe mbrojtjes, si edhe koordinimin me aleatët për sfidat aktuale të sigurisë ndërkombëtare.
Samiti i NATO-s në Ankara pritet të trajtojë çështje kyçe që lidhen me sigurinë euroatlantike, rritjen e kapaciteteve mbrojtëse dhe zhvillimet e fundit në mjedisin ndërkombëtar të sigurisë.
