Kryeministri shqiptar Edi Rama ka reaguar ashpër ndaj një postimi të zëdhënësit të Ministrisë së Jashtme të Iranit, Esmaeil Baqaei, i cili komentoi protestat që po zhvillohen në Tiranë.
Në reagimin e tij, Rama e interpretoi postimin iranian si një mbështetje të hapur të qeverisë iraniane për protestat dhe akuzoi Teheranin për ndërhyrje në debatin e brendshëm shqiptar.
“Shqipëria nuk merr leksione për demokracinë dhe sovranitetin nga një regjim që censuron qytetarët e vet, kufizon internetin dhe shtyp mendimin ndryshe”, u shpreh Rama në rrjetet sociale.
Kreu i qeverisë kujtoi gjithashtu konfliktin diplomatik mes Shqipërisë dhe Iranit pas sulmeve kibernetike të vitit 2022, duke theksuar se autoritetet shqiptare i atribuuan ato aktorëve të lidhur me shtetin iranian. Ai e cilësoi Iranin si një regjim që nuk ka autoritet moral për të komentuar mbi zhvillimet demokratike në Shqipëri.
Nga ana tjetër, zëdhënësi iranian kishte deklaruar se protestat në Shqipëri pasqyrojnë pakënaqësi qytetare ndaj qeverisë dhe i kërkoi Ramës të dëgjojë kërkesat e protestuesve në vend që të fajësojë faktorë të jashtëm.
Polemika vjen në një kohë kur protestat e nisura fillimisht kundër projektit të zhvillimit në Zvërnec janë zgjeruar në kërkesa më të gjera politike dhe kanë tërhequr vëmendje të mediave dhe aktorëve ndërkombëtarë.
