Përplasjet mes qeverisë dhe organizatorëve të protestave qytetare janë intensifikuar pas procedimit penal të disa pjesëmarrësve dhe drejtuesve të tubimeve që po zhvillohen prej ditësh në kryeqytet.
Sipas njoftimit të Policisë së Tiranës, 16 shtetas janë proceduar penalisht për veprat e dyshuara “Pengimi i qarkullimit të mjeteve të transportit”, “Prishja e rendit dhe qetësisë publike” dhe “Organizimi dhe pjesëmarrja në grumbullime e manifestime të paligjshme”.
Ndër personat e proceduar ndodhen edhe disa nga organizatorët dhe figurat më të njohura të protestës, përfshirë Arben Kolën, Luçiana Kokajn dhe Arilda Lleshin. Gjithashtu, policia bëri të ditur se po vijon puna për shoqërimin e dy personave të shpallur në kërkim.
Sipas autoriteteve, hetimet lidhen me vijimin e tubimit përtej orarit të njoftuar zyrtarisht, mosrespektimin e perimetrit të përcaktuar për protestën dhe bllokimin e qarkullimit në disa akse rrugore të Tiranës.
Policia pretendon gjithashtu se një pjesë e protestuesve kanë hyrë në zonën e “Fan Zone” në sheshin “Skënderbej”, duke ndërprerë aktivitetet e planifikuara dhe duke bërë thirrje për t’iu bashkuar protestës.
Nga ana tjetër, organizatorët dhe mbështetësit e lëvizjes qytetare e kanë cilësuar procedimin penal si një përpjekje për të ushtruar presion ndaj protestuesve dhe për të frenuar mobilizimin publik. Sipas tyre, protestat janë zhvilluar në mënyrë paqësore dhe përfaqësojnë një reagim qytetar ndaj situatës politike dhe sociale në vend.
Ndërkohë, Policia e Tiranës ka paralajmëruar se do të vijojë identifikimin dhe procedimin e personave të tjerë që dyshohet se kanë shkelur ligjin gjatë zhvillimit të tubimeve.
Kjo është hera e dytë brenda pak ditësh që autoritetet nisin procedime penale ndaj pjesëmarrësve në protesta, pasi më herët ishin referuar materiale procedurale edhe për 19 persona të tjerë.
Pavarësisht zhvillimeve, organizatorët kanë deklaruar se protestat do të vijojnë edhe në ditët në vijim, duke këmbëngulur në kërkesat e tyre për ndryshime politike dhe institucionale.
