Viti 2025 po mbyllet me tensione të forta mes qeverisë greke dhe fermerëve, ndërsa protestat bujqësore vijojnë të mbeten një sfidë serioze për autoritetet. Pavarësisht thirrjeve të vazhdueshme për dialog, sindikatat e fermerëve refuzojnë të ulen në bisedime, duke deklaruar se nuk kanë garanci për rezultate konkrete dhe se dialogu rrezikon të mbetet formal.
Një moment vendimtar për zhvillimet e ardhshme pritet të jetë takimi kombëtar i fermerëve që do të mbahet në Malgara, pranë Selanikut. Nga vendimet që do të merren në këtë mbledhje do të varet nëse situata do të qetësohet përmes dialogut, apo nëse qeveria do të kalojë në një qasje më të ashpër.
Sipas burimeve qeveritare, aktualisht janë në shqyrtim dy skenarë: vazhdimi i dialogut në rast se fermerët ulin tonet dhe hapin rrugët e bllokuara, ose aktivizimi i planit alternativ që parashikon masa ndëshkuese, gjoba administrative dhe ndërhyrje për lirimin e hapësirave publike.
Zyrtarë të lartë të qeverisë theksojnë se kryeministri nuk e favorizon përshkallëzimin e situatës dhe përdorimin e sanksioneve, por paralajmërojnë se refuzimi i dialogut dhe vazhdimi i bllokadave mund ta bëjnë këtë zgjedhje të pashmangshme.
Sinjale për ndryshim qasjeje janë dhënë edhe nga ministra të kabinetit, të cilët kanë deklaruar se zbatimi i ligjit mbetet një opsion nëse veprimet e paligjshme vazhdojnë. Në të njëjtën kohë, po shqyrtohet seriozisht vendosja e gjobave administrative ndaj pronarëve të traktorëve që marrin pjesë në bllokada, pasi autoritetet kanë identifikuar mjetet edhe në rastet kur targat janë hequr.
Brenda radhëve qeveritare po rriten edhe kritikat ndaj disa sindikalistëve bujqësorë, të cilët akuzohen se po e përdorin protestën për qëllime politike. Sipas autoriteteve, krahas fermerëve me kërkesa legjitime, në protesta janë përfshirë edhe individë apo grupe që synojnë përfitime politike, duke e tensionuar më tej situatën.
Ndërsa afron fundi i vitit, mbetet e paqartë nëse dialogu do të rikthehet si zgjidhje, apo nëse Greqia do të hyjë në vitin e ri me masa më të ashpra ndaj protestave bujqësore.
