1.4 milionë euro për këshilltarin e Trump. Tetë muaj nga nënshkrimi i kontratës, është zbuluar më në fund pagesa që mori fushatuesi amerikan Chris La Civita për humbjen e Partisë Demokratike në zgjedhjet e 11 majit. Sipas raportit financiar të dorëzuar në KQZ, PD ka paguar 1.4 milionë euro për Chris La Civita, së bashku me ekipin e tij, të përbërë nga ish-fushatuesi tjetër Paul Manafort dhe Sterwart Jackson.
Avokati Idajet Beqiri në një intervistë tha se sipas tij, La Civita ka marrë 20 milionë dollarë dhe jo shifra që është deklaruar. Gjatë intervistës në studio, avokati theksoi se SPAK duhet të hetojë këtë çështje dhe të mos kalojë pa u “hedhur dritë”.
“E kupton çdo shqiptar se çfarë para e jashtëzakonshme në këtë vend është e pistë që nuk ndodhet nëpër banka. Saliu nga viti 1992, të gjitha vendet e punës, pa paguar kuotën domethënë ta blinte vendin e punës, nuk futej. Pushtetin e kanë dashur sepse kanë qenë të bindur dhe janë futur në borxh për ta blerë vendin e punës. Është shumë e vërtetë dhe ata që kanë konkurruar, kur janë përplasur me të tilla shifra që do ta blinin vendin janë tërhequr dhe flasin sa u kanë kërkuar që të bëheshin deputetë. La Civita ka marrë 20 milionë dollarë. Këtë çështje SPAK duhet ta regjistrojë. Ky është një pastrim i pastër. Është një vepër penale e dukshme. Dhe këto vepra i fillon kryesisht SPAK, por duket se nuk ka kohë të merret me këtë”, tha avokati.
