Debat i ashpër është shënuar në një studio televizive mes gazetarit Alban Dudushi dhe deputetes demokrate Ilda Zhulali, lidhur me marrëdhëniet e kryeministrit Edi Rama me Shtetet e Bashkuara të Amerikës dhe narrativën e opozitës për këtë raport.
Diskutimi u ndez teksa në fokus ishte mungesa e Ramës në Davos dhe paralelisht vizita në Shqipëri e vajzës së presidentit amerikan Donald Trump. Dudushi deklaroi se ftesa e ardhur për Ramën rrëzon pretendimet e opozitës se ai ka përplasje apo “krisje” me SHBA-të, duke shtuar se nga kampi opozitar janë artikuluar edhe deklarata ekstreme se kryeministri mund të arrestohej në SHBA.
Kjo deklaratë u kundërshtua menjëherë nga Zhulali, e cila i kërkoi gazetarit të përmendte emra konkretë. “Kush nga opozita e ka thënë këtë? Nxirr emra”, u shpreh ajo, duke theksuar se deklarata të tilla nuk janë bërë nga përfaqësues të Partisë Demokratike, por sipas saj nga individë jashtë politikës.
Dudushi këmbënguli se këto qëndrime janë shprehur publikisht dhe edhe në komunikime joformale, por refuzoi të përmendë emra konkretë, duke thënë se po ruan korrektësinë profesionale. Kjo solli një tjetër reagim të fortë nga Zhulali, e cila e akuzoi gazetarin për krijim të një narrative të rreme në funksion të propagandës.
Debati u ashpërsua më tej kur Dudushi përmendi simbolikën e përdorur nga opozita, përfshirë figurën e “Ramaduros”, duke e konsideruar si pjesë të të njëjtës frymë akuzuese. Nga ana e saj, Zhulali u shpreh se këto ishin veprime simbolike dhe jo deklarata zyrtare për arrestime apo sanksione ndërkombëtare.
Përplasja mes palëve u mbyll pa një konkluzion të përbashkët, por me tone të forta dhe akuza reciproke, duke reflektuar edhe një herë klimën e tensionuar politike dhe mediatike që shoqëron raportin mes qeverisë shqiptare, opozitës dhe Shteteve të Bashkuara.
