Dokumenti paraprak i konkluzioneve të samitit të jashtëzakonshëm të BE-së të planifikuar për të enjten, u bën thirrje 27 liderëve evropianë të rrisin ndjeshëm shpenzimet e mbrojtjes nga vendet anëtare. Në të njëjtën kohë, Komisionit Evropian i kërkohet të identifikojë burime të reja financimi në nivel Komunitar, duke konsideruar gjithashtu një fleksibilitet më të madh në përdorimin e fondeve strukturore. Ftesa shoqërohet me kërkesë për paraqitjen sa më të shpejtë të propozimeve konkrete në këtë drejtim. Takimi i jashtëzakonshëm i 6 marsit do të zhvillohet në sfondin e thirrjeve të SHBA-së për evropianët që të marrin përgjegjësinë për mbrojtjen e tyre dhe rrezikut të një tërheqjeje të SHBA nga arkitektura e sigurisë së kontinentit.
Debati pritet të fokusohet në gjetjen e qindra miliardave për të mbështetur reformën e industrisë për projektet e mbrojtjes shumë të nevojshme, si mburoja e mbrojtjes ajrore, municionet, mbrojtja kibernetike dhe kufiri Bjellorusi-Rusi. Ndërsa fondet e kohezionit tashmë mund të përdoren për të ndihmuar prodhuesit e mbrojtjes të vendosen, kjo pothuajse nuk ndodh kurrë. Prandaj, vendet e BE-së tani presin dritën jeshile nga Komisioni për t’i shtyrë në këtë drejtim. Banka Evropiane e Investimeve mund të rishikojë rolin e saj në financimin e mbrojtjes, një çështje që tani po shqyrtohet nga liderët evropianë. Sipas një drafti të tekstit në diskutim, vendet e BE do të konsiderojnë rishqyrtimin e listës së aktiviteteve të përjashtuara. Deri më tani, politika e kreditimit të BEI-së ka përjashtuar investimet në armatime dhe prodhimin rreptësisht ushtarak.
