Presidenti i Francës, Emmanuel Macron, ka konfirmuar se do të tërhiqet nga politika pas përfundimit të mandatit të tij të dytë në vitin 2027, duke deklaruar se nuk planifikon të ketë angazhim politik pas presidencës.
Deklarata u bë gjatë një vizite në Nikosia, ku Macron theksoi se rrugëtimi i tij në politikë ka qenë i lidhur vetëm me presidencën. Ai kujtoi se nuk ishte pjesë e politikës përpara vitit 2017 dhe nuk do të jetë as pas largimit nga posti.
I zgjedhur për herë të parë në vitin 2017 në moshën 39-vjeçare, Macron u bë presidenti më i ri i Francës që nga themelimi i Republikës së Pestë në vitin 1958. Ai u rizgjodh në vitin 2022, por Kushtetuta franceze nuk i lejon një mandat të tretë.
Deklaratat e fundit bien në kontrast me qëndrime të mëparshme, kur ai kishte lënë të hapur mundësinë e një roli politik edhe pas përfundimit të presidencës. Megjithatë, kësaj here ai nuk dha detaje për planet e ardhshme.
Gjatë mandatit të tij, një nga reformat më të debatueshme ka qenë rritja e moshës së pensionit nga 62 në 64 vjeç, një vendim që ka shkaktuar protesta dhe është pezulluar përkohësisht deri pas zgjedhjeve të ardhshme.
Macron pranoi gjithashtu se faza e fundit e presidencës është sfiduese, duke theksuar nevojën për të mbrojtur arritjet dhe për të korrigjuar gabimet gjatë qeverisjes.
