Komisioni i Posaçëm Parlamentar për Reformën Administrativo-Territoriale zhvilloi dëgjesën e radhës në Dibër, ku morën pjesë qytetarë, përfaqësues të pushtetit vendor dhe aktorë të shoqërisë civile.
Në fjalën e tij, bashkëkryetari i komisionit dhe nënkryetari i Partia Demokratike, Luciano Boçi, deklaroi se reforma territoriale e vitit 2014 ka dështuar dhe se prova më e qartë e këtij dështimi është shpopullimi masiv i zonave rurale.
Sipas Boçit, reforma e vitit 2014 u realizua pa konsultim të qytetarëve dhe ishte më shumë një reformë politike sesa administrative.
Ai theksoi se dëgjesat publike janë të domosdoshme për të kuptuar nëse reforma ka përmirësuar jetën e qytetarëve, shërbimet, përfaqësimin dhe zhvillimin ekonomik në territore të ndryshme të vendit.
“Nëse realizojmë një reformë pa konsultuar qytetarin, atëherë kemi një reformë pa taban, si ajo e vitit 2014”, u shpreh Boçi.
Ai ngriti shqetësime për pabarazitë mes bashkive dhe mungesën e autonomisë fiskale të pushtetit vendor, duke deklaruar se “kush ishte bashki e varfër u bë edhe më e varfër”.
Boçi solli si shembull diferencën mes Dibër dhe Gjirokastër, duke theksuar se Dibra me rreth 150 mijë banorë ka vetëm katër bashki, ndërsa Gjirokastra me më pak banorë ka shtatë.
Sipas tij, kjo tregon se reforma nuk u ndërtua mbi kritere administrative, por mbi interesa politike.
Në fund të fjalës së tij, Boçi kërkoi forcimin e qarqeve, rritjen e kompetencave dhe autonomisë financiare të pushtetit vendor, si dhe bashkëpunim më të madh ndërmjet bashkive për të ndalur shpopullimin dhe emigracionin.
