Nga Redaksia EuroAlbania
Në një vend ku informaliteti është rregull dhe jo përjashtim, është paradoksale që goditja shtetërore bie pikërisht mbi ata që veprojnë në mënyrë të rregullt. Kjo po ndodh aktualisht në Shkodër, ku Policia Rrugore ka nisur një fushatë gjobash kundër furgonëve që transportojnë turistë drejt Thethit – edhe pse këto mjete janë të pajisura me licenca ndërkombëtare dhe operojnë në përputhje të plotë me ligjin.
Kjo nuk është më thjesht një histori abuzimi me kompetencat. Është një rast flagrant i shtetit që ndëshkon ligjshmërinë, duke i bërë dëm jo vetëm individëve që punojnë ndershëm, por edhe imazhit të Shqipërisë si destinacion turistik serioz.
Thethi, një prej mrekullive të natyrës shqiptare, frekuentohet çdo ditë nga turistë të huaj që mbërrijnë në Shkodër e më pas transportohen drejt fshatit nga furgonë privatë. Janë këta drejtues mjetesh që, me investimet e tyre, me dokumentacionin e rregullt dhe me përkushtimin për sigurinë e udhëtarëve, bëjnë të mundur funksionimin e një zinxhiri turistik që nuk mbështetet fare nga shteti.
Dhe megjithatë, këta njerëz ndëshkohen.
Policia nuk bën diferencim mes furgonëve të palicencuar dhe atyre që kanë licenca ndërkombëtare për transport pasagjerësh. Ky standard i dyfishtë krijon jo vetëm një situatë të padrejtë, por shtron edhe pyetjen thelbësore: A është ky një aksion për siguri, apo një përpjekje për të trembur dhe përjashtuar operatorët e vegjël nga tregu?
Nëse furgonët që shkojnë në Theth janë me dokumente të rregullta, përse ndëshkohen? Nëse çdo gjë është në përputhje me ligjin, përse ndalohet aktiviteti? Apo ndoshta problemet nuk janë me ligjin, por me autoritetet që nuk e lexojnë atë?
Ajo që ndodh në Shkodër është një akt frikësimi institucional. Është përpjekje për të dobësuar operatorët e pavarur që nuk janë nën ndikimin e strukturave të mëdha ekonomike apo politike. Në vend që të mbështesë sektorin, shteti bën presion mbi të. Në vend që të lehtësojë rregullat për të nxitur turizmin malor, zbaton në mënyrë selektive ligjin mbi ata që janë më të ekspozuar.
Në një vend normal, këta furgonë do të ishin pjesë e një rrjeti të certifikuar nga bashkia, me promovim nga Ministria e Turizmit dhe me mbështetje për të përballuar flukset sezonale. Në Shqipëri, janë në shënjestër. Në një vend normal, licenca ndërkombëtare do të përbënte garanci. Këtu, është thjesht një letër që askush nuk e merr seriozisht.
Në vend që të ndihmojë ata që veprojnë në përputhje me ligjin, shteti shqiptar po dërgon një mesazh të rrezikshëm: Ligji nuk të mbron. Puna e ndershme nuk të shpëton. Edhe nëse je i rregullt, je i cenueshëm.
Nëse ky është modeli i turizmit që promovon Shqipëria, atëherë duhet të ndalemi dhe të pyesim: Kujt i shërben ky shtet? Turistëve, qytetarëve dhe sipërmarrësve të ndershëm – apo interesave të errëta që nuk duan konkurrencë të lirë dhe as zhvillim lokal?
