Gazetari Bledian Koka ka komentuar qëndrimet e fundit të kryeministrit Edi Rama ndaj drejtësisë dhe mbrojtjen publike që ai i ka bërë bashkëpunëtoreve të tij të vjetra, Belinda Ballukut dhe Mirlinda Karçanajt, të cilat ndodhen nën hetim nga SPAK.
Në një intervistë televizive, Koka theksoi se Balluku dhe Karçanaj janë ndër bashkëpunëtoret më jetëgjata të Ramës, që nga koha kur ai drejtonte Bashkinë e Tiranës e deri në qeverisjen aktuale. Sipas tij, ky raport i gjatë bashkëpunimi tregon një lidhje të fortë besimi, por ngre edhe pikëpyetje mbi përgjegjësitë që ato kanë pasur në menaxhimin e institucioneve kyçe.
Koka u ndal veçanërisht te vizita e Ramës në AKSHI, ku kryeministri mbrojti publikisht ish-drejtoreshën Mirlinda Karçanaj dhe paralajmëroi rritje pagash për punonjësit. Sipas gazetarit, kjo sjellje bie në kontrast me qëndrimet e mëparshme të Ramës ndaj sistemit të drejtësisë, kur kishte kritikuar kërkesat për rritje pagash nga gjyqtarët dhe prokurorët.
Ai argumentoi se mbrojtja e figurave të afërta dhe premtimet për rritje pagash në një institucion që menaxhon tendera me vlera të larta, krijojnë perceptimin e standardeve të dyfishta në raport me fondet publike.
Në analizën e tij, Koka tha se qëndrimet e fundit të kryeministrit tregojnë presion politik dhe një përpjekje për të mbrojtur bashkëpunëtorët më të afërt. Sipas tij, situata politike në vend është bërë e parashikueshme dhe zhvillimi i vetëm që do të konsiderohej realisht lajm, do të ishte largimi i Ramës nga pushteti.
