Deputeti i Partisë Demokratike, Belind Këlliçi, ka reaguar ashpër pas mbledhjes së Grupit Parlamentar të Partisë Socialiste të drejtuar nga kryeministri Edi Rama, duke e cilësuar situatën si një moment kritik për demokracinë dhe shtetin e së drejtës në Shqipëri.
Në një postim në rrjetet sociale, Këlliçi thekson se paralajmërimi i Ramës për ndërhyrje ligjore nuk ka asnjë lidhje me sqarime kushtetuese, por synon mbrojtjen personale dhe shpalljen e pushtetit si të paprekshëm nga drejtësia. Sipas tij, përpjekja për të ndryshuar ligjin në mes të një hetimi penal është një akt i rëndë që e çon vendin drejt një rruge autoritare.
Deputeti demokrat shprehet se kjo lëvizje nuk ka të bëjë me mbrojtjen e ndonjë ministri, por me frikën e kryeministrit nga hetimi i aferave korruptive që, sipas tij, burojnë drejtpërdrejt nga zyra e kryeministrisë. Ai e cilëson këtë si përpjekje për të garantuar pandëshkueshmëri për veten dhe bashkëpunëtorët e tij.
“Me këtë akt, Shqipëria prek fundin dhe pushteti po tenton të mbrohet me ligj nga drejtësia,” shkruan Këlliçi, duke paralajmëruar se vendi rrezikon të kthehet në një regjim ku ligji i shërben vetëm qeverisë.
Në përfundim, Këlliçi u bën thirrje qytetarëve që të reagojnë dhe të marrin pjesë në protestën e paralajmëruar për ditën e nesërme, më 10 shkurt, në orën 17:00, përballë Kryeministrisë, duke e cilësuar këtë si një moment vendimtar për mbrojtjen e demokracisë dhe të shtetit ligjor.
