Tensionet ndërkombëtare vijojnë të rriten, ndërsa Irani i ka dërguar një letër zyrtare Bullgaria, duke shprehur shqetësimin për praninë e avionëve ushtarakë amerikanë në territorin e saj.
Sipas autoriteteve iraniane, këta avionë janë parë duke u furnizuar me karburant në aeroportin “Vasil Levski” në Sofje, çka ka nxitur reagimin diplomatik të Teheranit. Në letër, Irani ka shprehur pakënaqësinë dhe ka lënë të kuptohet se kjo situatë mund të ndikojë në marrëdhëniet mes dy vendeve.
Nga ana tjetër, zëvendësministri i Jashtëm bullgar, Marin Raikov, ka reaguar duke theksuar se Bullgaria nuk është pjesë e asnjë konflikti dhe nuk ka angazhim ushtarak në operacionet në Lindjen e Mesme.
Ai sqaroi se nuk ka avionë amerikanë të stacionuar në mënyrë të përhershme për qëllime luftarake dhe se çdo aktivitet i tillë nuk lidhet me përfshirjen e vendit në ndonjë operacion ushtarak.
Sofja zyrtare ka theksuar gjithashtu se synon të ruajë marrëdhënie të balancuara diplomatike me Iranin, pavarësisht zhvillimeve të fundit dhe tensioneve në rritje në rajon.
Ky episod vjen në një moment delikat për sigurinë globale, ku çdo lëvizje ushtarake apo logjistike po monitorohet me kujdes dhe mund të ketë pasoja në raportet ndërkombëtare.
