Tensionet mes Shteteve të Bashkuara dhe Iranit janë përshkallëzuar më tej, pasi Teherani ka reaguar ashpër ndaj ultimatumit të lëshuar nga Donald Trump për rihapjen e Ngushtica e Hormuzit.
Në deklarata të transmetuara nga mediat shtetërore iraniane, një zëdhënës i autoriteteve iraniane paralajmëroi se çdo zgjerim i konfliktit do të ketë pasoja të rënda për rajonin. “Nëse agresioni zgjerohet, i gjithë rajoni do të kthehet në ferr për ju”, u shpreh ai, duke shtuar se përpjekjet për të mposhtur Iranin do të përfundojnë në një “moçal” ku kundërshtarët do të “fundosen”.
Kjo deklaratë vjen menjëherë pasi Trump paralajmëroi se Irani ka vetëm 48 orë kohë për të hapur kalimin detar strategjik, duke kërcënuar me pasoja të rënda ushtarake në rast të mosrespektimit.
Përplasja e retorikës mes dy palëve rrit frikën për një përshkallëzim të mëtejshëm të konfliktit në Lindjen e Mesme, me pasoja të mundshme për sigurinë rajonale dhe ekonominë globale, veçanërisht për tregjet e energjisë që varen nga ky korridor jetik detar.
