Debatet për zgjedhjet në krye të Partia Demokratike e Shqipërisë janë ashpërsuar më tej, pasi juristja Alesia Balliu dhe avokati Idajet Beqiri kanë lëshuar akuza të forta ndaj kreut demokrat Sali Berisha.
E ftuar në një emision televiziv, Balliu deklaroi se PD “ka vetëm emrin demokratike”, ndërsa pretendoi se partia është “uzurpuar nga Berisha dhe klani i tij familjar”.
Sipas saj, procesi për zgjedhjen e kryetarit nuk përfaqëson një garë reale, por një farsë politike ku kundërshtarët përjashtohen paraprakisht.
“Një pretendent për kryetar partie nuk mund të zgjedhë vetë kundërshtarët që do të ketë përballë”, deklaroi ajo, duke shtuar se kishte informuar edhe kancelari perëndimore për atë që e cilësoi si shkelje statutore dhe mungesë gare në PD.
Balliu pretendoi gjithashtu se Sali Berisha nuk do të fitonte nëse ajo dhe Ervin Salianji do të lejoheshin të kandidonin.
Nga ana tjetër, avokati Idajet Beqiri e cilësoi procesin në PD si një “farsë” që synon vetëm legjitimimin formal të Berishës në krye të partisë.
Sipas tij, në historinë e kësaj force politike nuk ka pasur kurrë zgjedhje të vërteta të brendshme, pasi kontrolli ka mbetur gjithmonë në duart e Berishës.
Beqiri përmendi edhe garën historike mes Sokol Olldashi dhe Lulzim Basha, duke pretenduar se Berisha kishte mbështetur Bashën si figurë të afërt me familjen e tij politike.
Në deklaratat më të forta, Beqiri tha se Berisha “është kthyer në një kal të ngordhur”, duke argumentuar se statusi “non grata” dhe izolimi politik e kanë dobësuar rëndë pozitën e tij si lider opozite.
Debati për drejtimin e Partia Demokratike e Shqipërisë është intensifikuar pas përjashtimit të disa kandidatëve nga gara për kryetar dhe në prag të votimit të 23 majit, ku Berisha pritet të garojë pa rivalë.
