Familjarët e Aleks Nika, një prej viktimave të protestës së 21 Janarit 2011, i kanë drejtuar një letër të hapur kreut të Delegacionit të European Union në Tiranë, Silvio Gonzato, ku shprehin shqetësim për ritmin e hetimeve të kryera nga SPAK.
Në letrën e firmosur nga Mark Nika dhe Rajmonda Nika, përkatësisht xhaxhai dhe bashkëshortja e Aleks Nikës, thuhet se pas 16 vitesh ende nuk ka drejtësi për viktimat e 21 Janarit.
Familja shprehet se prej tre vitesh, që nga momenti kur SPAK nisi zyrtarisht hetimet, nuk ka parë progres konkret për zbardhjen e plotë të çështjes.
“Kaluan muaj e muaj, u bënë 3 vite qëkurse SPAK nisi zyrtarisht hetimet. Për habinë tonë, me përjashtim të pak lajmeve rutinë për thirrjen e disa dëshmitarëve, nuk shohim të ketë pasur veprime të tjera për rivlerësim të fakteve të njohura dhe për zbulimin e fakteve të reja”, thuhet në letër.
Familjarët e viktimës shprehen se kanë konstatuar “ngadalësi” dhe mungesë vullneti për hetimin e asaj që e cilësojnë si “vrasje shtetërore”.
Në reagimin e tyre, ata kujtojnë edhe vendimin e European Court of Human Rights, i cili sipas tyre e ka cilësuar ngjarjen si krim shtetëror, si dhe detyrimin e vendosur nga Supreme Court of Albania ndaj SPAK për të hetuar zinxhirin komandues të ngjarjes.
“Veprimet e SPAK janë të ngadalta, kur duhet të ishin ofensive. Dosja tragjike ulëret për drejtësi”, thuhet më tej në letër.
Në fund të reagimit të tyre, familjarët i kërkojnë ambasadorit Gonzato një takim, për të diskutuar më gjerë mbi ecurinë e hetimeve dhe shqetësimet që ata kanë lidhur me procesin.
