Një zjarr i përmasave të mëdha ka përfshirë fshatin Drizë në Fier, duke detyruar autoritetet të evakuojnë 11 familje, ndërsa operacioni për izolimin e flakëve vijon në kushte të vështira për shkak të erërave të forta.
Zv.kryeministrja Belinda Balluku bëri të ditur se në operacion është angazhuar një helikopter i Forcave të Armatosura, ndërsa një helikopter i dytë pritet t’i bashkohet ndërhyrjes për të mbështetur përpjekjet për shuarjen e zjarrit.
Në terren ndodhen shërbimet e Policisë së Shtetit, përfshirë efektivë të Forcës së Posaçme “Shqiponja”, patrulla të Rendit Publik dhe Policisë Rrugore, të cilat po asistojnë në evakuimin e banorëve dhe garantimin e sigurisë në zonë.
Sipas autoriteteve, flakët u shfaqën gjatë orëve të paradites dhe, të favorizuara nga era e fortë, u përhapën me shpejtësi drejt zonave përreth.
Strukturat e Emergjencave Civile, në bashkëpunim me shërbimet zjarrfikëse dhe institucionet e tjera përgjegjëse, vijojnë punën për izolimin dhe shuarjen e vatrës së zjarrit.
Autoritetet u bëjnë thirrje banorëve të respektojnë udhëzimet e forcave në terren dhe të shmangin afrimin pranë zonave të prekura, deri në neutralizimin e plotë të flakëve.
