Donald Trump ka njoftuar arritjen e një marrëveshjeje për armëpushim 10-ditor mes Izraeli dhe Libani, në një përpjekje për të ulur tensionet dhe për të hapur rrugën drejt një paqeje më të qëndrueshme në rajon.
Sipas deklaratës së publikuar nga Trump në rrjetin social Truth Social, marrëveshja u arrit pas bisedimeve që ai zhvilloi me liderët e të dy vendeve, përkatësisht kryeministrin izraelit Benjamin Netanyahu dhe presidentin libanez Joseph Aoun.
Armëpushimi pritet të hyjë në fuqi në orën 17:00 sipas kohës lindore të SHBA-së dhe do të zgjasë për 10 ditë, periudhë gjatë së cilës pritet të zhvillohen përpjekje intensive diplomatike për një marrëveshje më afatgjatë.
Trump bëri të ditur se zëvendëspresidenti JD Vance dhe sekretari i shtetit Marco Rubio do të angazhohen drejtpërdrejt me palët për të arritur një “paqe të qëndrueshme”.
Në deklaratën e tij, presidenti amerikan theksoi rolin e SHBA-së në ndërmjetësimin e konfliktit dhe përsëriti pretendimin se ka kontribuar në zgjidhjen e disa konflikteve ndërkombëtare, duke e cilësuar këtë si një tjetër sukses diplomatik.
Armëpushimi vjen pas një periudhe përshkallëzimi të dhunës mes Izraelit dhe forcave të lidhura me Libanin, duke rritur shpresat për një stabilizim të përkohshëm të situatës në Lindjen e Mesme.
