Mbledhja e radhës e Komisionit të Posaçëm për Reformën Territoriale është shoqëruar me debate mes mazhorancës dhe opozitës lidhur me mënyrën se si duhet të zhvillohen dëgjesat me aktorët e përfshirë në proces.
Mazhoranca ka propozuar që dëgjesat të zhvillohen në terren, me pjesëmarrjen e kryetarëve të bashkive, këshilltarëve bashkiakë dhe specialistëve të administratës lokale. Ky propozim është kundërshtuar nga përfaqësuesit e Partisë Demokratike, të cilët kërkojnë që diskutimet të mbahen në ambientet e Kuvendit.
Bashkëkryetari i komisionit nga opozita, Luçiano Boçi, argumentoi se shpërndarja e dëgjesave në disa takime në qarqe të ndryshme nuk është mënyra më e përshtatshme për të diskutuar një reformë kaq të rëndësishme. Sipas tij, një debat i zgjeruar në Kuvend do të siguronte përfshirjen e të gjithë deputetëve dhe një trajtim më të plotë të çështjes.
Nga ana tjetër, përfaqësuesit e mazhorancës këmbëngulën se procesi duhet të jetë sa më gjithëpërfshirës dhe të përfshijë sa më shumë aktorë në nivel vendor.
Zëvendëskryeministri Arbjan Mazniku theksoi se dëgjesat në terren synojnë të rrisin numrin e personave që japin mendim për reformën, duke përfshirë jo vetëm drejtuesit e bashkive, por edhe specialistët që punojnë çdo ditë me shërbimet publike.
Mazhoranca propozoi një formulë të ndërmjetme, sipas së cilës përveç dëgjesave në terren do të zhvillohen edhe dëgjesa publike në nivel qarku dhe takime në Kuvend.
Në përfundim të mbledhjes, u ra dakord që dy bashkëkryetarët e komisionit të mblidhen për të hartuar një axhendë mujore të qartë për zhvillimin e dëgjesave, në mënyrë që të gjithë aktorët e interesuar të kenë mundësi të marrin pjesë në procesin e konsultimit për Reformën Territoriale.
