Mbledhja e Komisionit të Posaçëm Parlamentar për Reformën Administrativo-Territoriale u shoqërua me tensione dhe shkëmbime të ashpra mes përfaqësuesve të opozitës dhe mazhorancës.
Gjatë diskutimeve, deputetja e PD-së Ina Zhupa ngriti shqetësime lidhur me situatën politike dhe protestat qytetare, duke argumentuar se pushteti vendor nuk po dëgjohet mjaftueshëm në procesin e reformës.
Ndërkohë, kryetari i Gramsh, Besion Ajazi, i pranishëm si i ftuar në dëgjesë, kërkoi që diskutimi të fokusohej te temat e reformës territoriale dhe jo te zhvillimet e ditës politike.
Kjo solli një përplasje verbale, ku Zhupa iu drejtua Ajazit duke i kërkuar të mos ndërhynte në fjalën e saj.
Pas këtij momenti reagoi bashkëkryetari socialist i komisionit, Arbian Mazniku, i cili mbrojti të drejtën e kryebashkiakut për t’u respektuar si përfaqësues i zgjedhur nga qytetarët.
“Mos i thuaj asnjë të zgjedhuri nga qytetarët ‘rri e mbaj vendin’. Ai atje ka marrë më shumë vota se ty”, u shpreh Mazniku.
Debati për reformën territoriale
Përtej përplasjes politike, diskutimet u fokusuan edhe te afatet e punës së komisionit. Mazniku ritheksoi qëllimin për të respektuar afatin e 15 korrikut për përgatitjen e raportit përfundimtar mbi reformën administrativo-territoriale, i cili më pas do t’i paraqitet Kuvendit për shqyrtim.
Një nga pikat e debatit ishte edhe propozimi i opozitës për përfshirjen në proces të përfaqësuesve të Kongresi i Autoriteteve Lokale dhe Rajonale i Këshillit të Evropës, si pjesë e konsultimeve për reformën.
Ngjarja pasqyron klimën e tensionuar politike që po shoqëron diskutimet për reformën territoriale, ndërsa palët mbeten të ndara si për procedurën ashtu edhe për përmbajtjen e ndryshimeve të mundshme.
