Zjarret në Brazil kanë shkatërruar një sipërfaqe pyjore prej 11 milionë hektarësh këtë vit. Siç njofton korrespondenti i Zërit të Amerikës, Yan Boechart nga Sao Paulo, kombinimi i thatësirës së madhe, temperaturave mbi mesataren dhe rrymave ajrore jashtëzakonisht të thata, kanë ndikuar në intensifikimin e zjarreve. Shkencëtarët thonë se Brazili po përjeton efektet e ngrohjes globale dhe se e ardhmja mund të sjellë akoma më shumë probleme.
Zjarret këtë vit kanë shkatërruar sipërfaqe të mëdha të pyjeve tropikale të Amazonës në Brazil. Zona të pasura bujqësore dhe madje edhe periferi të qyteteve braziliane janë djegur nga zjarret masive. Zonat e djegura llogariten të jenë sa sipërfaqja e Portugalisë.
Zjarret u intensifikuan gjatë gushtit dhe shtatorit, të nxitura nga temperaturat e larta mbi mesataren, mungesa e madhe e reshjeve dhe rrymat ajrore jashtëzakonisht të thata, me nivele lagështie në disa rajone që llogariten nën 10%.
“Rritja graduale e temperaturës, pakësimi i reshjeve dhe shtimi i rasteve të motit ekstrem janë pjesë e ndryshimeve klimatike globale me të cilat po përballet i gjithë planeti. Megjithatë, vendet tropikale, veçanërisht Brazili, janë shumë më të cenuara.”
Paulo Artaxo, shkencëtar për klimën, i ka kushtuar jetën studimit të ndikimit të ndryshimeve klimatike. Ai nuk shpreh habi për situatën aktuale dhe parashikon një të ardhme edhe më sfiduese për eksportuesit bujqësorë si Brazili.
