Situata e sigurisë rrugore në vend paraqitet alarmante, pas një serie aksidentesh të rënda që kanë sjellë viktima dhe të plagosur në vetëm pak ditë.
Gazetarja Denada Kola, gjatë një analize televizive, u ndal te bilanci i rëndë i fundjavës së fundit, ku sipas saj janë regjistruar të paktën 5 viktima dhe dhjetëra aksidente në të gjithë vendin.
Ajo theksoi se tragjedia e ndodhur në Durrës, ku humbën jetën dy fëmijë të mitur, është një sinjal i fortë se pasiguria në rrugë është kthyer në një problem serioz për çdo qytetar.
“Ngjarja na tregoi edhe një herë se asnjëri prej nesh nuk është i sigurt në rrugë. Këto raste përsëriten dhe krijojnë një ndjesi të fortë pasigurie,” u shpreh Kola.
Gazetarja solli në vëmendje edhe raste të tjera, përfshirë incidente në Tiranë, ku këmbësorë – madje edhe me fëmijë – janë vënë në rrezik në vijat e bardha nga drejtues të papërgjegjshëm.
Sipas saj, përsëritja e këtyre ngjarjeve tregon për mungesë të masave efektive parandaluese dhe për nevojën urgjente për reagim më të fortë institucional. Ajo nënvizoi se nuk mjafton vetëm ndërgjegjësimi individual, por kërkohen edhe politika më të ashpra dhe zbatim rigoroz i ligjit.
Situata aktuale ka rritur shqetësimin publik dhe ka nxitur debat për ndryshime në legjislacion, si dhe për forcimin e kontrollit ndaj shkeljeve të rënda në qarkullimin rrugor, me qëllim shmangien e tragjedive të tjera në të ardhmen.
