Ministrat e Jashtëm të vendeve anëtare të Bashkimit Evropian kanë dhënë mbështetje politike për thellimin e bashkëpunimit me vendet e Ballkanit Perëndimor në fushën e sigurisë dhe mbrojtjes, por njëkohësisht kanë përcjellë një mesazh të qartë për procesin e integrimit europian.
Gjatë takimit ministror të zhvilluar më 11 maj, diplomatët evropianë u takuan me përfaqësuesit e gjashtë vendeve të Ballkanit Perëndimor. Kosova u përfaqësua nga ministri në detyrë i Punëve të Jashtme dhe Diasporës, Glauk Konjufca.
Përfaqësuesja e Lartë e BE-së për Politikën e Jashtme dhe Sigurinë, Kaja Kallas, deklaroi se Bashkimi Evropian është i gatshëm të mbështesë rajonin në luftën kundër kërcënimeve hibride dhe dezinformimit, si dhe në forcimin e kapaciteteve mbrojtëse përmes Instrumentit Evropian të Paqes.
Megjithatë, ajo theksoi se përparimi në rrugën drejt anëtarësimit kërkon harmonizim të plotë me politikën e përbashkët të jashtme dhe të sigurisë të BE-së.
“Në këto kohë gjeopolitike, harmonizimi nuk është thjesht një detyrim formal, por tregon nëse ne e shohim botën në të njëjtën mënyrë”, u shpreh Kallas.
Ajo pranoi se jo të gjitha vendet e Ballkanit Perëndimor janë plotësisht të harmonizuara me politikën e sanksioneve të Bashkimit Evropian.
Në fokus të kritikave mbetet Serbia, e cila edhe pse aspiron anëtarësimin në BE, vazhdon të refuzojë vendosjen e sanksioneve ndaj Rusisë për shkak të luftës në Ukrainë.
Shefja e diplomacisë evropiane nënvizoi se nga vendet e rajonit priten reforma të mëtejshme, respektim i sundimit të ligjit dhe një qëndrim më i qartë në përputhje me politikën e jashtme evropiane.
