Deputeti i Partisë Demokratike Klevis Balliu ka ngritur akuza të forta ndaj qeverisë, duke e akuzuar për presion ndaj mediave dhe ndërhyrje në proceset e drejtësisë.
Në një videomesazh publik, Balliu deklaroi se largimi nga puna i gazetarit Ilir Babaramo nuk është rastësi, por lidhet drejtpërdrejt me qëndrimet e tij kritike ndaj qeverisë së Edi Rama.
Sipas tij, ky është një sinjal i qartë se liria e medias është në rrezik dhe se gazetarët që kundërshtojnë qeverinë përballen me pasoja profesionale.
Balliu shkoi më tej duke denoncuar edhe kërcënime ndaj dëshmitarëve në një çështje që ai e cilësoi si “dosja Rama–Balluku”, duke sugjeruar se ka tentativa për të ndikuar në hetimet dhe për të frikësuar personat e përfshirë.
“Ilir Babaramo u largua nga puna sepse nuk ishte dakord me qeverinë,” u shpreh ai, duke e konsideruar këtë si një provë të presionit politik mbi median.
Deri tani nuk ka një reagim zyrtar nga qeveria lidhur me këto akuza, ndërsa çështja pritet të thellojë përplasjen politike mes mazhorancës dhe opozitës, veçanërisht në një klimë tashmë të tensionuar.
