Babai i Sabah Nuzi ka reaguar publikisht duke mohuar kategorikisht përfshirjen e djalit të tij në vrasjen dhe zhdukjen e Klevis Lleshi.
Në një intervistë, Mustafa Nuzi deklaroi se akuzat janë të pavërteta dhe se djali i tij është përfshirë padrejtësisht në këtë ngjarje. Ai theksoi se është i gatshëm të përballet me drejtësinë dhe madje është zotuar “sipas Kanunit” për pafajësinë e të birit.
Sipas tij, edhe vetë autoritetet në fillim nuk kanë pasur prova konkrete, por vetëm dyshime, ndërsa shton se ai ka bashkëpunuar me policinë për zbardhjen e ngjarjes.
Mustafa Nuzi ngriti gjithashtu disa pikëpyetje mbi hetimet, duke kërkuar sqarime për persona dhe rrethana që sipas tij nuk janë hetuar siç duhet, përfshirë lëvizjet e fundit të viktimës dhe zhdukjen e automjetit të tij.
Ai pretendon se akuzat ndaj djalit të tij lidhen edhe me konflikte personale me përfaqësues të institucioneve, duke i cilësuar ato si të padrejta.
Ndërkohë, çështja mbetet nën hetim nga autoritetet, ndërsa Sabah Nuzi ndodhet në pranga edhe për një tjetër çështje, si i dyshuar për përfshirje në një atentat me eksploziv ndaj një automjeti.
Hetimet vijojnë për zbardhjen e plotë të kësaj ngjarjeje të rëndë.
