Një qytetar nga zona e Astirit në Tiranë ka denoncuar situatën e rëndë mjedisore dhe urbanistike që, sipas tij, po përkeqësohet çdo ditë. Zona, e cila është e banuar prej vitesh dhe vazhdon të popullohet çdo ditë e më shumë, është mbuluar nga mbeturinat dhe kanalet e ndotura, duke u kthyer në një moçal me erë të rëndë që rrezikon shëndetin e banorëve.
Sipas denoncimit, banorët jetojnë në kushte të vështira higjienike, ndërkohë që fëmijët rriten në një mjedis të ndotur dhe pa asnjë ndërhyrje nga autoritetet përgjegjëse.
Por problemi mjedisor shoqërohet edhe me ndërtime pa leje, të cilat, sipas banorëve, kryhen lirshëm dhe pa kontroll. Banorët thonë se kushdo mund të shtojë ballkone apo shtesa në mënyrë artizanale dhe pa asnjë siguri, duke rritur rrezikun në rast tërmeti.
Banorët shprehen se institucionet lokale dhe Komisariati Nr. 6 nuk kanë marrë masa konkrete për ndalimin e ndërtimeve abuzive apo për pastrimin e mbeturinave, duke krijuar bindjen se mungon bashkëpunimi real për zgjidhjen e problematikave të zonës.
Situata në Astir po kthehet në shqetësim të përhershëm për komunitetin, i cili kërkon ndërhyrje urgjente nga Bashkia e Tiranës dhe autoritetet e rendit për të rivendosur higjienën, rendin urban dhe sigurinë e banorëve.
