Një analizë e publikuar nga CNN vlerëson se presidenti kinez Xi Jinping po ndjek me vëmendje zhvillimet e luftës në Ukrainë dhe po studion dështimet e Rusisë për të nxjerrë mësime strategjike lidhur me ambiciet e Pekinit ndaj Tajvanit.
Analiza vjen pas takimit të Xi me presidentin rus Vladimir Putin në Pekin, vetëm pak ditë pasi lideri kinez priti në Kinë presidentin amerikan Donald Trump.
Sipas CNN, Pekini po përpiqet të ruajë një ekuilibër të kujdesshëm mes marrëdhënieve me Uashingtonin dhe Moskën, duke organizuar pritje pothuajse identike për Trump dhe Putin, si pjesë e një simbolike diplomatike të kontrolluar me kujdes.
Megjithatë, qëllimet politike të dy samiteve kanë qenë të ndryshme. Ndërsa takimi me Trump kishte për synim të tregonte Kinën si një partnere globale të qëndrueshme, takimi me Putinin u interpretua si një përpjekje për të forcuar sigurinë strategjike mes dy vendeve.
Xi e përshkroi partneritetin me Rusinë si një “forcë qetësie në mes të kaosit”, ndërsa paralajmëroi për rrezikun e “hegjemonisë dhe unilateralizmit”, në një kritikë të tërthortë ndaj politikës amerikane.
Analistët ndërkombëtarë vlerësojnë se lufta në Ukrainë po shërben si një laborator strategjik për Kinën në raport me Tajvanin. Ish-kryeministri japonez Fumio Kishida kishte paralajmëruar që në vitin 2022 se “Ukraina sot mund të jetë Azia Lindore nesër”.
Sipas analizës, Xi po studion veçanërisht vështirësitë e Rusisë për të arritur një fitore të shpejtë përballë një kundërshtari të mbështetur nga Perëndimi.
Në të njëjtën kohë, vizita e Putinit në Pekin nuk solli përparim konkret në projektin strategjik të gazsjellësit “Power of Siberia 2”, çka interpretohet si një sinjal se Kina po ruan avantazhin në marrëdhënien me Moskën.
Analisti Johann Fuhrmann nga Fondacioni Konrad Adenauer vlerëson se samitet e fundit tregojnë se qendra e politikës globale po zhvendoset gradualisht drejt Pekinit.
“Mesazhi është i qartë: as Uashingtoni dhe as Moska nuk mund ta injorojnë më Pekinin ose Xi Jinping”, përfundon analiza.
