Analisti Ben Andoni ka vlerësuar se ristrukturimi i fundit në kabinetin qeveritar nuk ishte rezultat i një analize performance, por një lëvizje e detyruar nga presioni në rritje i drejtësisë dhe i faktorëve ndërkombëtarë.
Sipas tij, ndryshimet e bëra vetëm gjashtë muaj pas nisjes së mandatit të ri tregojnë se situata politike është më e tensionuar sesa pritej. Andoni theksoi se normalisht ministrave do t’u jepej më shumë kohë për të treguar rezultatet, ndërsa mënyra e zëvendësimeve – të njoftuara në momentet e fundit – ngre pikëpyetje për standardet e funksionimit të qeverisë.
Ai argumentoi se përplasjet mes ekzekutivit dhe drejtësisë, si dhe vëmendja e shtuar e partnerëve ndërkombëtarë ndaj institucioneve të drejtësisë, kanë ndikuar drejtpërdrejt në vendimmarrjen politike. Sipas Andonit, këto zhvillime mund të sjellin paqëndrueshmëri të mëtejshme në kabinet.
Analisti u ndal edhe te performanca në sektorin e infrastrukturës, duke theksuar se investimet e mëdha publike duhet të shoqërohen me transparencë dhe cilësi më të lartë në realizim. Ai theksoi se në mungesë të një komunikimi zyrtar dhe një reflektimi publik mbi arsyet e ndryshimeve, lëvizjet duken të imponuara dhe jo pjesë e një strategjie të qartë qeverisëse.
