Konspiracionisti Alfred Cako ka komentuar zhvillimet e fundit politike në vend, duke pretenduar se pas heqjes së kufizimeve amerikane ndaj ish-kryeministrit Sali Berisha fshihet një strategji më e gjerë për të ndikuar mbi protestat qytetare që po zhvillohen në Shqipëri.
Në një deklaratë publike, Cako u shpreh se në fazat e para të protestave, sipas tij, si kryeministri Edi Rama ashtu edhe kreu i Partisë Demokratike, Sali Berisha, kishin mbajtur qëndrime të ngjashme në lidhje me investimet e debatuara në Zvërnec. Ai pretendon se ndryshimi i qëndrimeve erdhi pasi protesta mori përmasa të mëdha dhe fitoi mbështetje të gjerë publike.
Sipas Cakos, në momentin kur protestat u masivizuan, u tentua që ato të kanalizoheshin dhe të viheshin nën ndikimin e forcave politike. Ai pretendon se aktorë vendas dhe ndërkombëtarë kanë ndërhyrë për të ruajtur interesat e lidhura me investimet strategjike në jug të vendit.
“Kur u pa se protesta nuk po ndalej dhe po fitonte terren, u tentua që ajo të kontrollohej politikisht. Heqja e kufizimeve ndaj Berishës u përdor si një mjet për ta tërhequr atë nga mbështetja e drejtpërdrejtë e protestës dhe për të rikthyer ekuilibrat politikë”, deklaroi Cako.
Ai hodhi gjithashtu pretendime për ekzistencën e një mirëkuptimi të heshtur mes mazhorancës dhe opozitës, duke argumentuar se qëllimi final është garantimi i vazhdimit të projekteve të mëdha investuese, pavarësisht zhvillimeve politike.
Deklaratat e Cakos vijnë në një kohë kur protestat qytetare kanë hyrë në javën e tretë të tyre dhe debati mbi investimet në zonat e mbrojtura, veçanërisht në Zvërnec dhe Sazan, mbetet në qendër të vëmendjes publike.
Ndërkohë, Departamenti Amerikan i Shtetit konfirmoi javën e kaluar se është miratuar një përjashtim që i lejon Sali Berishës hyrjen në Shtetet e Bashkuara, duke argumentuar se vendimi i shërben interesit kombëtar amerikan. Institucioni nuk ka dhënë detaje të mëtejshme nëse masa prek edhe anëtarët e familjes së ish-kryeministrit apo nëse bëhet fjalë për një përjashtim të përkohshëm apo të përhershëm.
