Deputeti i Partisë Mundësia, Erald Kapri, ka akuzuar mazhorancën se po kufizon zërin e opozitës dhe po dëmton funksionimin e parlamentarizmit.
Duke marrë fjalën në seancën plenare, Kapri u ndal te masat disiplinore ndaj deputetëve të opozitës, përfshirë përjashtimin e kreut të Partisë Mundësia, Agron Shehaj.
“Kthehem në sallë pas 20 ditësh përjashtim, që nuk e di ende se pse u përjashtova. Më e rënda është që Kuvendi, me dhunën e kartonëve të kuq, ka përjashtuar edhe Shehajn për 30 ditë të tjera”, deklaroi ai.
Sipas Kaprit, Shehaj ka munguar në punimet parlamentare për rreth tre muaj si pasojë e masave të marra ndaj tij. Deputeti i cilësoi këto vendime si të papajtueshme me standardet e parlamentarizmit.
Ai iu referua gjithashtu protestave qytetare dhe kërkesave për dorëheqjen e qeverisë dhe shpërndarjen e Kuvendit.
“Mendoni se jeni pronarë të Shqipërisë dhe e keni kthyer vendin në këtë derexhe”, tha Kapri, duke iu drejtuar deputetëve të shumicës.
Deputeti ngriti shqetësime edhe për anulimin e kërkesave të opozitës për interpelanca, duke pretenduar se në këtë mënyrë po pengohet ushtrimi i të drejtave kushtetuese të deputetëve.
Në përfundim, Kapri kritikoi praninë e shtuar të forcave të policisë pranë godinës së Kuvendit, duke e lidhur atë me tensionet politike dhe protestat e ditëve të fundit.
