Pas 29 ditësh protestash të pandërprera, një pjesë e organizatorëve dhe aktivistëve kanë bërë publik një propozim për kalimin e lëvizjes në një fazë të re organizimi.
Sipas dokumentit të publikuar nga një prej anëtarëve të grupit koordinues, synohet krijimi i tre strukturave qytetare:
- Kuvendi Kombëtar Qytetar;
- Këshilli Ekzekutiv i Kuvendit Kombëtar Qytetar;
- Mbledhja e Përgjithshme e Popullit Shqiptar.
Autorët e nismës argumentojnë se këto struktura do të shërbejnë për të përfaqësuar vullnetin e protestuesve, për të koordinuar veprimet qytetare dhe, në rast të largimit të qeverisë aktuale, për të propozuar një qeveri teknike tranzitore.
Sipas projektit, Kuvendi Kombëtar Qytetar do të ketë fillimisht 150 anëtarë, me mundësi zgjerimi deri në 300 përfaqësues, përfshirë edhe anëtarë nga diaspora. Në dokument parashikohen kritere për kandidimin, të lidhura me integritetin personal, angazhimin qytetar dhe mospërfshirjen në strukturat drejtuese të sistemit politik ekzistues.
Ndër kompetencat e propozuara për Kuvendin përfshihen:
- thirrja e mbledhjeve të përgjithshme të protestuesve;
- emërimi dhe shkarkimi i Këshillit Ekzekutiv;
- koordinimi i organizimit të protestave;
- propozimi i përbërjes së një qeverie teknike tranzitore në rast të dorëheqjes së qeverisë aktuale;
- promovimi i formave të demokracisë së drejtpërdrejtë në nivel lokal.
Në dokument theksohet se këto struktura synojnë të funksionojnë si organizime qytetare dhe jo si institucione kushtetuese paralele, ndërsa nënvizohet se protestat do të vazhdojnë edhe gjatë procesit të krijimit të Kuvendit.
Për momentin, organizatorët kanë bërë thirrje për aplikime dhe kanë publikuar kontaktet e tyre personale për qytetarët që dëshirojnë të kandidojnë ose të përfshihen në procesin e organizimit.
Nisma mbetet një propozim i paraqitur nga një grup aktivistësh dhe nuk ka status zyrtar institucional.
