Deputeti i Partisë Demokratike, Bardh Spahia, ka reaguar me ironi ndaj kryeministrit Edi Rama pas deklaratave të tij të fundit lidhur me protestat dhe debatin për projektin në zonën e Zvërnecit.
Përmes një postimi në rrjetet sociale, Spahia u ndal te një detaj në komunikimin publik të kryeministrit, duke vënë në dukje përdorimin e gabuar të fjalës “flamingo”, të cilën Rama, sipas tij, e kishte shkruar “flamengo”.
Deputeti demokrat e shfrytëzoi këtë moment për të kritikuar qëndrimin e kreut të qeverisë ndaj qytetarëve protestues, duke theksuar se shumica e shqiptarëve, pavarësisht nëse i kanë parë apo jo nga afër flamingot, e njohin mirë situatën politike dhe arsyet e pakënaqësisë së tyre.
“Ndoshta 99% nuk i kanë parë ndonjëherë flamingot, por 99% dinë se pse po protestojnë”, shkruan Spahia në reagimin e tij.
Ai shtoi se, përpara se të ironizojë apo të përçmojë qytetarët, kryeministri duhet të tregojë më shumë kujdes në komunikimin publik.
Reagimi i Spahisë vjen në një moment kur debati politik është intensifikuar për shkak të protestave që po zhvillohen në Tiranë dhe në qytete të tjera, ndërsa përplasjet mes mazhorancës dhe opozitës vijojnë të dominojnë skenën politike.
