Një pankartë me një mesazh të fortë politik ka tërhequr vëmendjen gjatë protestës së zhvilluar përpara Kryeministrisë, ku mijëra qytetarë janë mbledhur për të shprehur pakënaqësitë e tyre ndaj qeverisë.
Mes shumë pankartave dhe thirrjeve të protestuesve, njëra prej tyre, e mbajtur nga përfaqësues të diasporës shqiptare, u bë menjëherë pjesë e vëmendjes së pjesëmarrësve dhe mediave.
“Na përzunë ndër vite, sot të përzëmë ne ty!”, shkruhej në pankartë, duke përcjellë një mesazh simbolik që lidhet me fenomenin e emigracionit dhe largimin e shqiptarëve nga vendi gjatë viteve të fundit.
Në ilustrimin e pankartës paraqitej një i ri me mbishkrimin “Diaspora”, i cili ngre grushtin lart përballë siluetave të qyteteve të njohura europiane, duke simbolizuar lidhjen e emigrantëve shqiptarë me protestat dhe zhvillimet në atdhe.
Pjesëmarrësit në protestë u shprehën se diaspora po luan një rol gjithnjë e më aktiv në mbështetjen e kauzave qytetare në Shqipëri, duke organizuar protesta dhe aktivitete sensibilizuese në vende të ndryshme të Europës dhe Amerikës.
Gjatë ditëve të fundit janë zhvilluar manifestime të ngjashme në qytete si Milano, Firence, Vjenë, Berlin, Londër dhe Uashington DC, ku komunitetet shqiptare kanë shprehur solidaritet me protestuesit në Tiranë.
Organizatorët e protestës theksuan se pjesëmarrja e diasporës tregon interesin dhe angazhimin e shqiptarëve jashtë vendit për zhvillimet politike dhe shoqërore në Shqipëri, ndërsa kërkesat e tyre lidhen me më shumë transparencë, llogaridhënie dhe përfaqësim qytetar.
Tubimi para Kryeministrisë vijoi në mënyrë paqësore, me pjesëmarrësit që përsëritën thirrjet dhe mesazhet e tyre drejtuar institucioneve shtetërore.
