Pas përfundimit të protestës para Kryeministrisë kundër projektit të resortit në Zvërnec, grupe protestuesish janë shpërndarë në zona të ndryshme të kryeqytetit, duke vijuar thirrjet për mobilizim qytetar.
Një pjesë e protestuesve u rikthyen në Sheshin “Skënderbej”, ndërsa të tjerë lëvizën në rrugët kryesore të Tiranës, ku u bënë thirrje qytetarëve që ndodheshin në kafene, ambiente publike apo në automjete t’u bashkoheshin protestave.
Sipas raportimeve nga terreni, disa protestues ndaluan përkohësisht qarkullimin e automjeteve në disa segmente rrugore, ndërsa një grup tjetër u drejtua pranë selisë së Partisë Socialiste. Po ashtu, pjesëmarrës të tjerë marshuan drejt zonës së “Bllokut”, duke kërkuar mbështetje nga qytetarët.
Gjatë lëvizjeve në qytet u dëgjuan thirrje dhe slogane kundër projektit në Zvërnec, ndërsa organizatorët kanë paralajmëruar vijimin e protestave edhe në ditët në vijim.
Protestat kundër investimit të planifikuar në Zvërnec kanë hyrë në ditën e katërt radhazi, me qytetarë dhe aktivistë që kërkojnë transparencë të plotë dhe rishikim të projektit në zonën e mbrojtur bregdetare.
