Protesta kundër projektit të resortit turistik në Zvërnec ka vijuar edhe këtë mbrëmje para Kryeministrisë, ku qindra qytetarë kanë shprehur kundërshtimin e tyre ndaj investimit dhe kanë përsëritur kërkesat për ndalimin e projektit.
Gjatë tubimit, protestuesit kanë deklaruar se nuk do të tërhiqen nga kauza e tyre dhe se mobilizimi do të vazhdojë deri në realizimin e kërkesave që kanë paraqitur. “Nuk e lëshojmë sheshin”, ishte një nga sloganet më të forta të dëgjuara gjatë protestës.
Pjesëmarrësit kërkojnë heqjen e gardhit të vendosur në zonën e Zvërnecit, duke e konsideruar atë simbol të kufizimit të aksesit publik dhe të nisjes së projektit që kundërshtojnë. Ata gjithashtu kërkojnë pezullimin e menjëhershëm të punimeve dhe hapjen e një procesi transparent konsultimi me komunitetin dhe grupet e interesit.
Mes pankartave dhe thirrjeve kundër qeverisë, protestuesit kanë theksuar se mbrojtja e territorit dhe e zonave me vlera natyrore është një çështje me interes publik dhe kombëtar.
Tubimi po zhvillohet nën masa sigurie dhe deri tani nuk raportohen incidente të rënda, ndërsa organizatorët kanë bërë thirrje për vijimin e protestës në mënyrë paqësore dhe qytetare.
